गणपती बाप्पाच्या आगमनाची चाहूल लागताच सर्वत्र मंगलमय वातावरण निर्माण होत आहे. अशा या मंगलमय वातावरणात ‘सन मराठी’ आपल्या प्रेक्षकांसाठी घेऊन येत आहे एक खास गणेशोत्सव विशेष कार्यक्रम म्हणजेच ‘सन मराठी गणेशोउत्सव २०२५’. या भक्तिमय कार्यक्रमाचं मुख्य आकर्षण म्हणजे सुप्रसिद्ध गायक राहुल देशपांडे यांची भक्तिमय गाणी प्रेक्षकांना लाईव्ह अनुभवायला मिळणार आहेत. याचसह सध्या युवा पिढीला अभंगांचे वेड लावणारा ग्रुप म्हणजे ‘अभंग रिपोस्ट’. पारंपरिक अभंगांना आधुनिक वाद्यांच्या साथीने सादर करणारा हा बँड कार्यक्रमाची शोभा वाढवणार आहे. गणेशोउत्सव २०२५ च्या निमित्ताने ‘सन मराठीचं’ कुटुंब पहिल्यांदाच एकत्र पाहायला मिळणार आहे. हा कार्यक्रम येत्या ५ ऑगस्ट रोजी भारतरत्न गानसम्राज्ञी लता मंगेशकर नाट्यगृह, महाजन वाडी, मीरा रोड येथे सायंकाळी ठीक ६:३० वाजता पार पडणार आहे.
या उत्सवात केवळ सुरांची मैफल नाही, तर आपल्या लाडक्या कलाकारांचा जल्लोष ही पाहायला मिळणार आहे. ‘सन मराठी’च्या सर्व लोकप्रिय मालिकांमधील कलाकारांच्या खास परफॉर्मन्सने बाप्पाच्या चरणी श्रद्धा अर्पण करतील आणि प्रेक्षकांच्या चेहऱ्यावर हास्य उमटवतील. नृत्य, नाट्य, गाणं आणि धमाल गेम्सच्या साथीने हे कलाकार सणाच्या रंगात रंगून, कार्यक्रमात धमाका घडवणार आहेत. एकंदरीतच ‘सन मराठी गणेशोत्सव २०२५’ म्हणजे भक्ती, कलात्मकता आणि करमणुकीचा फुल्ल ऑन पॅकेज! असणार आहे. या कार्यक्रमासाठी प्रवेश विनामूल्य असून, जागा मर्यादित असल्याने प्रथम येणाऱ्यांना प्राधान्य दिले जाईल. ही बातमी किंवा त्याचा फोटो पास म्हणून दाखवून प्रवेश मिळू शकतो. चला तर मग बाप्पाचं आगमन जल्लोषात करूयात, ‘सन मराठी गणेशोत्सव २०२५’ कार्यक्रमात आनंद लुटुयात.
